Universis et singulis nobis in Christo dilectis Ecclesiarum et Monasteriorum
etiam exemptorum prelatis; Abbatibus; Prioribus; Prepositis; Decanis; Capitulis;
Parrochialibusque Ecclesiarum rectoribus; Plebanis; Viceplebanis; ceterisque
presbiteris; Clericis; Notarijs; et tabellionibus publicis per civitatem
et diocesim nostram Frisingensem, ubilibet constitutis; ad quos presentes
nostre littere pervenerint; quosque presens tangit negotium;
Salutem in domino
et nostris; immo verius Apostolicis; firmiter obedire mandatis; Noveritis
nos vigore certi transsumpti litterarum sanctissimi in Christo patris et
domini nostri; domini Leonis divina providentia Pape decimi; Contra quendam
fratrem Martinum Luther ordinis sancti Augustini heremitarum; eiusque adhaerentes
Complices fautores et receptatores; occasione erronee atque piarum mentium
seductive doctrine ac scripturarum dicti fratris Martini nuper Rome Decimoseptimo
calendas Julii anno vicesimo emanatarum; per honorabilem nobis in Christo
Dilectum Joannem Eckium sacre Theologie et Canonum Doctorem prefati domini
nostri Pape ad infra scripta nunctium iam sepius esse requisitos; quatenus
easdem litteras Apostolicas seu illarum transsumpta publica per dictas Civitatem
et diocesim nostras publicari curaremus. Unde requisitioni ac mandatis Apostolicis
huiusmodi ex debito obedientie obtemperare volentes; vobis omnibus et singulis
supradictis in virtute sancte obedientie; et sub penis in dictis litteris
Apostolicis contentis stricte precipientes mandamus; quatenus postquam vigore
presentium fueritis requisiti; seu alter vestrum fuerit requisitus; dictas
litteras Apostolicas seu earum transsumpta publica omniaque et singula in
eis contenta in Concionibus ecclesiarum et Monasteriorum vestrorum ac alibi,
ubi, quando et quotiens opus fuerit, Christifidelibus diligenter publicetis
et intimetis ac publicari et intimari permittatis et faciatis; omnes et singulos
Christifideles supradictos fideliter exhortando, ut ab erroribus et doctrina
prefati fratris Martini Luther in dictis litteris Apostolicis designatis eorumque
predicatione, publicatione, assertione, defensione, libellorum ac scripturarum
editione omnino abstineant; Neque libellos, predicationes, scripturas sive
cedulas erroneam doctrinam dicti Martini Luther in se continentes de cetero
laudent, imprimant, vendant, publicent, sive defendant publice vel occulte,
aut eosdem in eorum domibus sive aliis locis tenere seu occultare quoquo modo
presumant, vel aliquis eorum presumat. Quinimo illos post publicationem presentium,
prelatis et decanis Capitulorum ad comburendum sine omni dilatione assignare
curent, aliasque et alia faciant, que ipsos et quemlibet eorum seie litterarum
Apostolicarum huiusmodi respective concernunt, prout ultionem divinam ac
prefati Domini nostri Pape indignationem, necnon sententias, censuras et
penas alias in ipsislitteris Apostolicis expressas voluerint evitare.
Datum
in arcve nostra Frisingensi,
die decima Mensis Januarii Anno domini Millesimo
Quingentesimo Vigesimoprimo;
Sub nostri secreti impressione.
(Faksimilenachdruck, in: Dokumente zur Causa Lutheri 2, 350).